Таңбалы музей-қорығында түркі халықтарының рухани құндылықтары мен мәдени мұрасы талқыланды

           Таңбалы мемлекеттік тарихи-мәдени және табиғи музей-қорығында «Түркі халықтарының рухани құндылықтары мен мәдени мұрасы» халықаралық конференциясы өтуде.

         Іс-шараға Қазақстан, Әзербайжан, Қырғызстан, Түркия, Өзбекстан және басқа да түркі әлемі елдерінің өкілдері қатысып жатыр.

          Конференция барысында Түркі мәдениеті мен мұрасы қоры жанынан құрылған Реставраторлар мен тарихшы-сәулетшілер консультативтік кеңесінің бірінші отырысы өтті. Сарапшылар түркі археологиялық мұрасын зерттеу және қалпына келтіру саласындағы ынтымақтастық перспективаларын талқылады.

          «Мемлекет басшысы Ұлттық құрылтайдың үшінші отырысында еліміздің тарихи-мәдени мұрасын сақтау мен жаһандық деңгейде насихаттаудың маңызынн ерекше атап өтті. Біздің міндетіміз – «Тарихи-мәдени мұра объектілерін қорғау және пайдалану туралы» заңды жетілдіру аясында жұмыс істеу», – деді Қазақстан Республикасы Мәдениет министрлігі Мәдениет комитетінің төрағасы Күміс Сейітова.

          Жиын барысында «Таңбалы» музей-қорығына келушілер орталығында петроглифтерді сақтауға зор үлес қосатын жартастағы суреттерді қалпына келтіруге арналған ғылыми-реставрациялық зертхана ашылды.

         Қатысушылар сонымен қатар «Есік» мемлекеттік тарихи-мәдени музей-қорығы мен «Құлан» көне қалашығын аралап, экскурсиялар жасады.
          Айта кетейік, конференция Таңбалы ескерткіштерінің ЮНЕСКО-ның Бүкіләлемдік мәдени мұралар тізіміне енгізілгеніне 20 жыл толуына орай ұйымдастырылып отыр.